හංගේරියාවේ උපන් සා සා ගැබෝර් අමෙරිකාවට සේන්දු වූයේ හංගේරියානු රූප රාජිනිය ලෙස අභිෂේක ලැබීමෙන් වසර 5කට පසුවය. එවකට 24 හැවිරිදි තරුණියක ලෙස රූමත් බවින් සහ ලාලිත්‍ය යෙන් පිරිපුන් ඇගේ රූපශ්‍රීය එකළ හොලිඩුඩ් සිනමාව එකළු කිරීමට හොඳටෝම ප්‍රමාණවත් විය.
දඟකාර බවත්, කටකාර බවත් අඩු වැඩි නැතිව පිහිටා තිබූ බැවින් එකළ හොලිවුඩ් පුරවරයේ පමණක් නොව අමෙරිකාවේ ව්‍යාපාරික ලෝකයේත් කාගෙත් නොමඳ ආදරයට පාත්‍ර වූ සා සා පසුකළෙක වාර්තාපොතට ඇතුළත් වූයේ සිනමා රංගනයෙන් නොව වැඩිම විවාහ ගණනාවක් සිදුකරගත් හොලිවුඩ් නිලිය ලෙසටය.
30 - 40 දශකවල අමෙරිකානු සිනමාවේ හිටපු සුරූපි නිලි ලානා ටර්නර් සහ හොලිවුඩ් නිලි එලිසබෙත් ටේලර් විවාහ 8ක් සිදු කරගනිද්දී ඉන් ඔබ්බට ගිය සා සා ගේ අතගත් වල්ලභයන් සංඛ්‍යාව 9කි.
පසුගියදා මෙලොවින් සමුගන්නා විට 99 හැවිරිදි වියෙහි පසුවූ සා සා සිය ජීවිත කාලයෙන් වැඩි හරියක්ම ගත කළේ රංගනයට නොව පෙම් සම්බන්ධතා පටලවා ගැනීම වෙනුවෙනි. ඒ අතින් ඇයට නිලියකට වඩා වැඩි ජනප්‍රියත්වයක් හිමිවී තිබිණි.
රංගනයට මෙන්ම දිගුකාලීනව අමෙරිකානු සමාජයේ ජේත්තුකාර නෝනා කෙනකු ලෙස කාලය ගත කළ සා සා ජීවිතයෙන් සමුගත්තේ හදිසියේ වැළඳුණු හෘදයාබාධයකිනි. බෙවර්ලි හිල්ස් හී සමාජශීලී කාන්තාවක ලෙස කා අතරත් ප්‍රකට වී සිටි ඇගේ දඟකාර ජීවිතය බිඳ වැටෙන්නට වූයේ 2002 දී රිය අනතුරකට මුහුණපෑමෙන් පසුවය. එසේ නොවුණා නම් ඇගේ වල්ලභයන් ප්‍රමාණය දුසිමකටත් වඩා ඉහළ යනු ඇතැයි සමහරු කියති.
මෙලොවින් සමුගන්නා විට ඇය ජීවත්වූයේ ඇගේ 9 වැනි සැමියා වූ ජර්මානු සම්භවයක් ඇති අමෙරිකානු ව්‍යවසායකයකු වූ ෆෙඩ්රික් ප්‍රින්ස් සමග ලොස් ඇන්ජලීස් නුවර පිහිටි සුපිරි මන්දිරයකය.
සමස්තයක් වශයෙන් ගත් කළ සිනමා නිලියන්ගේ ප්‍රකාශ හුදු ප්‍රලාප ලෙස බැහැර කිරිම සාමාන්‍ය සමාජයේ මෙන්ම ඉහළ සමාජයේ ද සිරිතකි. හොලිවුඩයේ පමණක් නොව සෙසු රටවල සිනමා ක්ෂේත්‍රය තුළත් නිලියන්ගේ ප්‍රකාශවලට එතරම් තැනක් ලැබෙන්නේ නැත. එසේ වුවත් මේ සුරූපි නිලිය වරින් වර කළ ප්‍රකාශ අදටත් හොලිවුඩයේ පමණක් නොව ලොව පුරා යම් තරමකින් උදාන පාඨ බවට පත්වීම එක් අතකින් විමතිය දනවන සුලුය.
ඉන් ඇතැම් ප්‍රකාශවලින් පැහැදිලි වන්නේ නිලියකට වඩා ගැහැනියක ලෙස ඇය සතු තීක්ෂණ බුද්ධියයි. තවත් පැත්තකින් බැලූ විට ඕනෑම පිරිමියකු වසඟයට ගැනීම චිත්‍රපටයක රඟපෑමට වඩා ලෙහෙසි කාරණාවක් බවට පත්කරගෙන සිටි ඇය පිරිමින් අරභයා කළ ඇතැම් ප්‍රකාශ සිත්ගන්නා සුලුය. විවාදාත්මකය.
රිය අනතුරින් පසුව සිරුරේ කොටසක් අප්‍රාණිකව එක්තැන් වූවාට පසුව ඇය පිළිබඳ අවධානයත්, කතාබහත් සමාජයෙන් මැකී ගියත් මේ නිලියගේ සිනමා රංගනයට වඩා අමෙරිකානු ජනතාව අතර තවමත් මතකයේ පවතින්නේ එසේ ඇය විසින් වරින් වර ප්‍රකාශ කළ දේවල්ය.
පිරිමින් සමග නිරතුරුවම ඇලී ගැලී සිටීමට වැඩි කැමැත්තක් දැක්වූ සා සා සිය කුළුඳුල් හොලිවුඩ් නිර්මාණයට එක්වූයේ 1952 වසරේ තිරගත වූ ‘ලව්ලි ටු ලුක් ඇට්‘ චිත්‍රපටයෙනි. චිත්‍රපට 29කට සිය රංගන දායකත්වය ලබා දුන් ඇගේ අවසන් චිත්‍රපටය 1993 දී තිරගත වූ ‘ද බෙවර්ලි හිල්බිලිස්‘ ය. ඒ වෙද්දී 76 හැවිරිදි වියෙහි පසුවූ ඇයට ඉන් පසුව චිත්‍රපට ලැබුණේම නැත. එහෙත් ඊට පසු වසරේදී එනම් 1994 දී ඇය ‘දිස් ඉස් යුවර් ලයිෆ්‘ රූපවාහිනී වෘතාන්ත චිත්‍රපටයේ රඟපෑමට අවස්ථාවක් උදාවිය. එය ඇගේ රංගන දිවියේ අවසන් නිර්මාණය විය.
‘මම විවාහ වෙන්න හරිම ආසයි‘
මුල සිටම සා සා එසේ කියා සිටියත් විවාහ 9ක්ම එය දුරදිග යනු ඇතැයි එකළ කවුරුවත් නොසිතූ බව නම් සහතිකය. එහෙත් ඇගේ ඒ ප්‍රකාශයේ බරපතල කම වැඩිකල් යන්නට මත්තෙන් කවුරුත් අවබෝධ කරගත්තේ ඇය තරම් පිරිමින්ට පෙම් කළ නිලියක් හොලිවුඩ් පුරවරයේ නොසිටි බැවිනි.
‘මම මිනිහෙක්ට රහට කෑම උයලා දෙන්න ආසයි...මුලු ජීවිත කාලයම මිනිස්සු එක්ක ගත කරන්න ආසයි...මං ආදරයට ආදරෙයි....ඇගේ මේ රසවත් ප්‍රකාශවලට හොලිවුඩයේ පමණක් නොව අමෙරිකාවේ ප්‍රබලතම ව්‍යාපාරිකයන් ද රැවටුණු හැටි පුදුමාකාරය.
ඇය සිය පළමු විවාහය සිදුකොට ගත්තේ හංගේරියාවේ රූ රැජන ලෙස අභිෂේක ලැබීමෙන් වසරකට පසුවය. 1937 දී තුර්කි රාජතාන්ත්‍රික නිලධාරියකු වූ බර්හාන් ආසෆ් සමග විවාහ වෙද්දී ඇයට අවුරුදු 20කි. අනතුරුව 1941 දී ඇය අමෙරිකාවට සේන්දු වූයේ සිය පළමු විවාහය කටුගා දැමීමෙන් පසුවය.
අමෙරිකාවට පා තැබීමෙන් පසුව ඇය මුලින්ම අයිතිකරගත්තේ රට හෝටල් ක්ෂේත්‍රය තුල කෝටිපති ව්‍යාපාරිකයකු වූ කොන්රාඩ් හිල්ටන් ය. ඒ 1942 වසරේදීය. ලොව පුරා ව්‍යාප්තවී ඇති සුප්‍රකට ‘හිල්ටන්‘ හෝටල් ව්‍යාපාරයේ නිර්මාතෘවරයා ඔහුය. ව්‍යාපාරික සැමියා තම නිදහසට උවමනාවට වඩා ඇඟිලි ගසන බව කියමින් ඇය ඔහුගෙන් දික්කසාද වුයේ 1947 දීය. ඇගේ විවාහයන් 9න් ඇයට උපන් එකම දියණියගේ පියා වූයේ ද හිල්ටන්ය. ෆ්‍රැන්සිස්කා හිල්ටන් නමින් උපන් ඇගේ දියණිය මීට වසර දෙකකට පෙර මෙලොවින් සමුගත්තාය.
ඊට වසර දෙකකට පසුව ඔස්කාර් සම්මාන දිනූ බ්‍රිතාන්‍ය සිනමා නළුවකු වූ රුසියානු ජාතික ජොර්ජ් සැන්ඩර්ස් සමග අතිනත ගත් සා සා 1954 දී ඔහු දික්කසාද කොට තවත් අවුරුදු 8ක් යනතුරු තනිකඩව සිටියාය. එහෙත් ඒ කාලය තුල ඇය විසින් ඇති කරගන්නා ලද පෙම් සම්බන්ධතා නම් අනන්තය.
අමෙරිකානු නීතිවේදියකු වූ හර්බට් හන්ටර් සමග ඇය සිය සිවුවැනි විවාහය සිදුකොට ගත්තේ 1962දීය. අනතුරුව 1966 මාර්තු මස 3 වැනිදා ඔහුගෙන් දික්කසාද වූ ඇය ඊට දින 6කට පසුව සිය පස්වැනි විවාහය ප්‍රබල තෙල් සමාගම් හිමිකාරයකු වූ ජෝෂුවා කොස්ඩන් සමග සිදුකරගනිද්දී 49 හැවිරිදි වියෙහි පසුවූවාය. ඒ විවාහය වසර දෙකකට සීමාවූවකි. අනතුරුව 1975 දී මෝස්තර නිර්මාණ ශිල්පියකු වූ ජෝන් රයන් සමග විවාහ වූ ඇය ඊට වසරකට පසුව ඔහුගෙන් දික්කසාද වූවාය. 1976 අගෝස්තු මස 24 වැනිදා ඔහුගෙන් දික්කසාද වී දින තුනකින් ඇගේ 7 වැනි විවාහය සිදුවූයේ අමෙරිකානු නීතිවේදියකු වූ මයිකල් ඕහාරා සමගිනි. එහෙත් ඒ විවාහය 1983 දී කටුගා දැමූ ඇය ඉන් පසුව මෙක්සිකානු නළුවකු වූ ෆෙලිපී ඩි ඇල්බා සමග අතිනත ගත්තාය. ඒ වනවිට මයිකල් ඕහාරාගේ දික්කසාද නඩුව නිමාවට පත්වී නොතිබූ බැවින් ඇල්බා සමග ඇතිකරගත් විවාහ ගිවිසුම දින කිහිපයකින් අවලංගු විය.
ජර්මානු සම්භවයක් ඇති අමෙරිකානු කර්මාන්තකරුවකු වූ ෆෙඩ්රික් ප්‍රින්ස් සමග වසර 1986 දී අතිනත ගත් සා සාගේ ‘පිරිමි පිපාසය‘ ඉන් නිමාවට පත්විය.
සිය විවාහ සහ පිරිමින් අරභයා ඇය විසින් වරින් වර කරනු ලැබූ ප්‍රකාශ ලොව පුරා ඉමහත් ජනප්‍රියත්වයකට පත්විම එක් අතකින් පුදුමයට කාරණාවක් නොවූයේ ඇය තරම් දික්කසාද අත්දැකීම් ඇති නිලියක් නොසිටි බැවිනි.
‘මට තෑගි කළ දියමන්ති ආපහු දෙන්න හිතෙන තරමට මම කිසිම පිරිමියකුට වෛර කරන්නේ නෑ..‘
‘විවාහ වනතුරු හැම පිරිමියෙක්ම අසම්පුර්ණයි..විවාහයෙන් පස්සේ එයාලා ඉවරෙටම ඉවරයි..‘
‘මම හරි අපූරු ගෘහපාලිකාවක්. මිනිහෙක්ව දික්කසාද කරන හැම වතාවේදිම මම එයාගේ නිවස අයිතිකරගන්නවා...‘ ‘මම නිතරම විශ්වාස කරන්නේ අපේ ජීවිතයේ බැරෑරුම් සිදුවීම් හැමවිටම සැහැල්ලුවට ගත යුතු බවයි. ඒ වගේම සැහැල්ලු ඒවා නිතරම බැරෑරැම් විදිහට ගත යුතුයි. හැබැයි මේ නිසාම මම අමාරුවේ වැටුණු අවස්ථා එමටයි..‘
‘පර්සියානු පිරිමින්ට ආදරය කරනවා හැරෙන්න වැඩ කරන්න වෙලාවක් නැති තරම්. අමෙරිකානු පිරිමින්ට වැඩ කරනවා හැරෙන්න ආදරය කරන්න වෙලාවක් නැති තරම්...‘
‘විවාහය ගැන මම නිතරම බැලුවේ ඒක පනහට පනහේ වැඩක් විදිහටයි. මට නම් මම විවාහ වෙන පිරිමියා අඩුම තරමේ අවුරුදු 50ක වයසකවත් සිටිය යුතුයි. ඒ වගේම ඔහුට ඩොලර් මිලියන 50කවත් බූදලයක් තිබිය යුතුයි..‘
‘මගේ විශ්වාසය නම් හැම ගැහැනියකටම සැමියන් තිදෙනකුවත් සිටිය යුතුයි කියලයි...‘ ‘පිරිමි ආදරය කරන්නේ දෑස්වලින්...ගැහැනු ආදරය කරන්නේ සවනින්.‘
‘මම කවදාවත් පිරිමින්ට මාව තෝරාගන්න ඉඩ තියන්නෙ නෑ..මමයි පිරිමින්ව තෝරගන්නෙ..‘ ඇගේ ජිවිතයේ පිරිමින් අරභයා කළ මෙවැනි ප්‍රකාශ පසුකලෙක බොලිවුඩ් පුරයේ ඉමහත් ජනප්‍රියත්වය පත්විය. සැබැවින්ම සා සාගේ ජීවිතයේ ඇය විසින් ඇසුරු කරනු ලැබූ පිරිමින්ගේ සංඛ්‍යාව කොතෙක් දැයි ඇයටවත් මතක නැත.
එබැවින් පසුකලෙක එවැනි පිරිමින් මුණගැසෙන හැම වාරයකදීම ඇය ඔවුන් ඇමැතීමට පුරුදුව සිටියේ ‘ඩාලිං‘ කියාය.
(ෆවුස් මොහොමඩ්_දිනමිණ)
